TEQSIMUYU QALLARIYNINMANTA

(De los orígenes de la tierra)

  Hayk’a watañan kay Pachamama kawsayninmanta? Hayk’a unayñataq kay teqsimuyu kamasqanmanta?

  Pikunan kaykunata yachankuman? Suyukuna kamachikuqkunachu? Qolqesapa runakunachu? Qhapaq suyukunachu? Hamawt’akunachu? Yachaysapa (científico) runakuna nisqakunachu? Chaqhay avionniyoq, barcoyoq, fabricayoq, industrial runakunachu chaykunata yachankuman?

Papa de Roma nisqachu imaymanakunata yachanman? Pikunapunin yachankuman?

     Sichus ñoqanchis ñan kimsa ñeqen waranqalliman (hacia el tercer milenio) chayamuranchis, chayqa, ajllasqa runakunachá kakunchis. Apu Taytanchischá kay p’unchaykunaman chayananchistaqa munakuran. Paypunin munaran.

     Pitaq kay Taytanchisrí? Qankuna reqsinkichischu? Wakinkunaqa manachu hina. Illa Teqsi Wiraqocha nispan ñawpaq runakuna Taytanchistaqa sutinchakuranku. Pacha Ruraq Apu, Pachamama kamaq Apunmi Illa Teqsi Wiraqochaqa. Manan Hoq Wiraqochachu. Huqllan Apunchisqa. Manan iskay apukunachu, kimsa apukunachu, askha apukunachu. Huqllan Apunchisqa. Paymi Hanaqpacha Ruraq, Kaypacha Kamaq, Tukuy Pacha Kamaq, Paqarina Kamaq, Waranikuna (constelaciones) Kamaq, Imaymana Kamaq. Huqllan Taytanchisqa.

  Kay Apunchisllan imaymanakunata yachakushan: noqanchismanta, kawsayninchismanta, nunanchismanta yuyayninchismantawan, kay teqsimuyumanta, yachayninchismanta, imaymanakunamanta.

  Payllan hayk’a watakunan kay teqsimuyu qallariyninmanta puririrqan. Hayk’a pachakunan ñawpaq k’anchaymanta, ñawpaq illamanta kashan. Hayk’a unayñan ñawpaq runa paqarimusqanmanta.